Presos políticos bascos em Teixeiro ponhem-se em greve de fame trás 5 anos em isolamento

Ícone da massificaçom, o desrespeito da legislaçom penitenciária vigente e a impunidade dos funcionários de prisons, o macrocárcere de alta segurança de Teixeiro volve situar-se no centro da actualidade informativa trás o início dumha greve de fame indefinida por parte dos presos independentistas bascos Íñigo Guridi e Goio Escudero no passado 13 de Agosto. A adopçom da extrema medida reivindicativa produz-se trás ambos militantes permanecer, respectivamente, 5 e 4 anos em isolamento sem se visualizar o remate dumha situaçom ilegal que vulnera a integridade psicofísica de ambos e a própria legislaçom espanhola. O objectivo da greve de fame é, portanto, saír definitivamente do chopano (módulo de isolamento) e ser transferidos a um módulo de primeiro grau como módulo habitual de destino. Segundo as fontes que nos informam, a vontade dos dous militantes bascos é prolongar a greve até que se consigam os objectivos polos que foi iniciada nesta segunda-feira. Respondendo à demanda de solidariedade do Movimento pro-Amnistia de Euskal Herria, de Ceivar daremos cumprida informaçom sobre o desenvolvimento desta iniciativa e desenvolveremos as iniciativas que consideremos necessárias para dar a conhecer à sociedade galega este caso de ‘tortura branca’ prolongada que se está a produzir no nosso chao. Difusom da greve de fame Dizer, aliás, que à extrema situaçom actual se chega trás um largo caminho de denúncias por parte dos presos políticos e dos seus familiares. Foram precisamente estes últimos quem se entrevistaram em Julho de 2003 com o daquela director do centro penitenciário, Carmelo Vilches Perelló. A marcha do opusdeista Vilches e a sua substituiçom polo actual director de Teixeiro Antonio Vázquez Prado em Julho de 2005 nom supujo nengumha modificaçom quanto à utilizaçom do módulo de isolamento, prorrogando-se a incomunicaçom total de Guridi e Escudero, assi como de outros presos. Além das iniciativas de solidariedade e denúncia que se ponham em andamento desde o organismo popular anti-repressivo, Ceivar convida a todos os meios de comunicaçom alternativos, ou que simplesmente defendem os mais elementares direitos dos presos e presas políticas, a dar a máxima difusom à presente informaçom. Pola nossa parte iremos actualizando neste portal todo o referido à greve de fame que se vem de iniciar em Teixeiro desde o dia 13 de Agosto.