Ceivar iniciará acçons judiciais e políticas contra as FSE trás a selvajada policial do Dia da Pátria

Quando as feridas e os golpes e pancadas recebidos onte começam a enfriar e se diagnosticam as consequências sanitárias da selvajada policial cometida pola ‘Unidad de Intervención Policial’ na madrugada do Dia da Pátria, o organismo popular anti-repressivo está a contactar com aquelas pessoas que fôrom objecto de agressom com o objectivo de adoptar umha iniciativa colectiva de resposta à violência policial. A contestaçom que pretendemos desenvolver abrange o plano jurídico-legal, reunindo partes médicos e apresentando as denúncias preceptivas, e o plano político-social, procurando que o acontecido esta noite passada nom fique na ocultaçom à que decidírom condená-lo a prática totalidade dos meios de difusom espanhóis operativos no nosso País. Convidamos aquelas pessoas que tivérom possibilidade de recabar material gráfico a que contactem com Ceivar para facilitar este com a finalidade de difundi-lo e, eventualmente, utilizá-lo como prova. Aliás, convidamos também àquelas pessoas que fôrom objecto da violência a que tirem imagens gráficas das marcas e lesons sofridas como mais umha prova que facilite a contestaçom política. Manuel Ameijeiras Vales, ‘Delegado del Gobierno’ espanhol numha parte do nosso País demonstrou mais umha vez a sua calanha moral e política e até que ponto está disposto de inzar as ruas da Galiza de ferid@s e contusionados com tal de servir os desígnios de Madrid. Queremos comunicar à maxima representaçom política e repressiva do Estado na nossa Terra que nom vamos ficar calados nem caladas e que o strip tease fascista realizado ao calor do ‘Día del Patrón de España’ vai ser conhecido apesar do silêncio canino dos meios de comunicaçom espanhóis.