Manuel Ameijeiras Vales (A Corunha, 1949) é o alvo dumha iniciativa cidadá que procura a “demissom imediata” do actual ‘Delegado del Gobierno’ na CAG por “agir contra os mais elementares princípios democráticos, utilizando as forças e corpos de segurança do Estado contra todo tipo de movimentos, mobilizaçons e conflitos sociais”. A recolha de assinaturas que visa demandar a demissom do máximo responsável das forças policiais e de ocupaçom na Galiza administrativa parte da associaçom Movimento polos Direitos Civis. @s promotores da dinámica denunciam a sequência de intervençons policiais que nos últimos anos e, especialmente, nos últimos meses, abordam por meio da violência institucional os conflitos sociais que se desenvolvem no País. Assi, podemos falar do Metal viguês, a luita de Reganosa, o conflito de Valga, as mobilizaçons d@s operári@s de Atento na Corunha, a constituiçom por todo o País de Conselhos Locais de Segurança que aplicam as directrizes da ‘Delegación del Gobierno’, as iniciativas mediáticas e policiais contra a Assembleia da Mocidade Independentista desenvolvidas desde 14 de Novembro de 2005, etc. Desde a sua nominaçom como sucessor do ex-simpatizante dos ‘Guerrilleros de Cristo Rey’ e também ‘Delegado del Gobierno’ Arsenio Fernández de Mesa, Ameijeiras Vales destacou-se como repressor vocacional, partidário do emprego da violência sistemática como método de neutralizaçom de conflitos sociais e aspirante a mais altos destinos institucionais no Reino de Espanha. A subordinaçom canina da prática totalidade dos meios de difusom ‘oficiais’ a estas políticas é indicativa, também, dum problema muito mais grave e profundo, e de como o ‘Delegado del Gobierno’ nom conta apenas com forças policiais e militares para desenvolver a sua estratégia, mas com a total fidelidade dum entramado mediático sempre disposto a silenciar, manipular e criminalizar às ordens da “Delegación’. Apoio crítico à iniciativa De Ceivar apoiamos e apoiaremos qualquer iniciativa que, dum mínimo de claridade política, denuncie o labor repressivo da ‘Delegación del Gobierno’ e consciencialize mobilize o nosso povo contra esta, como ocorre no caso da articulada do MpDC. Contodo, queremos apontar a excessiva personalizaçom que encontramos na demanda: Manuel Ameijeiras Vales nom é mais do que um piom na execuçom da estratégia repressiva definida polo PSOE na Galiza administrativa. A sua actuaçom, com independência dos matizes pessoais que achegue o talante do alto funcionário, responde, em última instáncia, a directrizes políticas e policiais emanadas do Executivo que preside Rodríguez Zapatero e nom a um perfil pessoal. Portanto, com ser umha iniciativa que pode acrescentar o grau de consciencializaçom sobre o problema, a demissom de Ameijeiras Vales nom aborda a situaçom repressiva em que vivemos, nem enfrenta o recurte geral de liberdades desenvolvido ante a generalizada passividade social. Constata-se aliás que as diferenças existentes entre PP e PSOE em matéria de repressom e liberdades políticas som ínfimas, como se comprova dia-a-dia tanto na política da ‘Delegación del Gobierno’ quanto nas políticas municipais de ‘segurança’ aplicadas polos governos locais ‘progressistas’. Da óptica de Ceivar, umha resposta global e coerente de denúncia do contexto repressivo nom se pode limitar a exigir a substituiçom duns responsáveis policiais por outros, mas vincar especialmente em: 1º O carácter ilegítimo da presença no nosso território nacional de forças policiais e de ocupaçom espanholas e das funçons sociais, políticas e ideológicas que estas forças cumprem. Reconhecer e legitimar, por activa ou por passiva, esta presença, é umha garantia para a continuidade da repressom. 2º A denúncia da própria existência dum organismo como a ‘Delegación del Gobierno’ que, além de representaçom institucional da presença e a imposiçom jurídico-política de Espanha no nosso País, é a cúspide do sistema policial e militar denunciado. 3º A utilizaçom de todos os meios legais e judiciais existentes à nossa disposiçom para defender-nos perante a repressom policial e judicial e a articulaçom de dinámicas em que agentes sociais diversos respostem em conjunto frente a sucessos e políticas repressivas concretas. Anexamos o linque inferior onde se pode assinar a demanda de demissom do ‘Delegado del Gobierno’ Manuel Ameijeiras Vales.