COMEÇA A REPRESSOM NA GREVE DO SECTOR NAVAL NAS COMARCAS DO SUL DO PAÍS Contra o que comentou para os meios de comunicaçom algum representante sindical, de os detidos nom pertencerem aos grevistas, três operários (dous trabalham nas subcontratas e outro num estaleiro) foram detidos em Vigo na sexta jornada de greve (terça-feira) dos trabalhadores dos estaleiros e das empresas auxiliares. As detençons produziram-se após a finalizaçom da jornada de mobilizaçons, quando os trabalhadores regressavam as suas moradas. Depois de passar algumhas horas na esquadra da polícia foram postos em liberdade com os cargos de desordens públicas e vandalismo. NOVA ESTRATÉGIA REPRESSIVA. INFILTRAÇOM DE AGENTES NAS MOBILIZAÇONS Tratando de evitar que as ruas de Vigo se convertam como o ano passado num campo de batalha às portas do processo eleitoral o governo espanhol nom está acompanhando as mobilizaçons operárias com unidades de intervençom rápida e aposta por outra estratégia repressiva. A infiltraçom de agentes à civil nas marchas dos operários procuram principalmente dous objectivos. Controlar os movimentos dos grevistas e seleccionar trabalhadores propícios que deter para ter “culpáveis” ante eventuais actos que transgredam legalismos, e ao tempo, para condicionar a posiçom do Comité de greve e dos sindicatos ante umha eventual resoluçom do conflito. CUMPLICIDADE MEDIÁTICA E POLÍTICA COM O PATRONATO. Jornais como o Faro de Vigo, na sua linha colaboracionista e anti-operária, revelam a identidade dos trabalhadores detidos colocando nas suas páginas as iniciais dos detidos junto ao nome da empresa para a que trabalham. Assinalando-os claramente ante os seus patrons. A Presidenta da Cámara Municipal de Vigo, Corina Porro, através do seu vereador de seguridade solicitou da subdelegaçom do governo medidas repressivas contra as mobilizaçons operárias. SOLIDARIEDADE DE CEIVAR. Do organismo Popular Anti-repressivo CEIVAR queremos mostrar o nosso apoio e solidariedade como os trabalhadores detidos e com o conjunto de grevistas animando-os a se organizarem contra a repressom.