Ugio Caamanho é transferido novamente ao centro penitenciário de Puerto de Santa Maria I

O Executivo espanhol vem de decidir umha nova transferência do preso independentista Ugio Caamanho desde o seu último destino em Valdemoro (Madrid) para a prisom de Puerto I, no extremo sul da Península Ibérica, a mais de 1000 quilómetros da Galiza. O deslocamento decidido por Instituiçons Penitenciárias praticava-se no dia de onte, passando o prisioneiro político a noite no cárcere de Córdoba e chegando hoje a Puerto I. As visitas programadas para a fim-de-semana ficárom impossibilitadas perante esta nova transferência. Deste modo, o preso independentista galego é objecto dumha mobilizaçom carcerária, passando até o momento polos cárceres de Soto del Real, Valdemoro, Navalcarnero, Cáceres, Puerto de Santa María, Valdemoro e, novomente, Puerto de Santa María, sem incluirmos as paragens intermeias realizadas em outros centros penitenciários durante as ‘cundas’. O tratamento penitenciário de que está sendo objecto o cidadám galego impede o desenho de qualquer estratégia de vida dentro de prisom, umha vez que as condiçons de habitabilidade, os regimes, etc. estám sendo modificados continuamente no que é mais umha parte do tratamento repressivo global de que é objecto de forma individualizada. Segundo as nossas informaçons, Ugio Caamanho continua em isolamento desde o passado mês de Fevereiro, quando fora capturado por carcereiros da prisom de Cáceres trás umha tentativa de fuga. De Ceivar exigimos novamente a repatriaçom de Caamanho, o cessamento das medidas especiais de que está sendo objecto, tais como o isolamento, o alonjamento e a dispersom, e a suspensom de todas as medidas cautelares que, ao igual que à presa independentista Giana Gomes, lhe estám sendo aplicadas, a começar pola imposiçom dumha prisom preventiva –sem celebraçom de juízo- que vai caminho dos dous anos de duraçom.