O Julgado de Instruçom número 2 de Ferrol deu trámite processal numha vista, no passado dia 16, às descaradas mentiras dum membro da agência privada de segurança Prosegur do cámpus universitário de Esteiro (Ferrol). Segundo o próprio agente de Prosegur afirmou durante a sessom,nom viu o rosto da pessoa que no mês de Setembro se atopava fazendo pintadas no cámpus, contra a crescente privatizaçom da universidade (suba das taxas académicas). Pese a desconhecer com certeza, portanto, a autoria dos factos,co qual fica patente que ao acusar o rapaz encausado está a incorrer em flagrante mentira (e talvez num delito de denúncia falsa, penado polas leis espanholas que, no entanto, se pretendem aplicar contra o independentista em base às palavras dum Prosegur que tranquilamente afirma que nom viu este moço perpetrando os factos objecto de juízo), a Fiscalia solicitou multa de 6 euros/dia durante 25 dias, enquanto a Universidade da Corunha solicitava do companheiro 120 euros em conceito de limpeza. Somadas, 270 euros de condena. O rapaz acusado é militante dumha organizaçom estudantil independentista,Agir,e o seu trabalho político é o que Prosegur, amparado na boa acolhida que por parte dos tribunais espanhóis soem ter as denúncias sem provas contra @s activistas polític@s,pretende punir. A agência privada de segurança, junto coa instituiçom para a qual desenvolve labores de repressom dos movimentos que no seu seo a questionem,nom poderiam permitir que a opiniom pública universitária observasse que a realizaçom de pintadas de conteúdo reivindicativo nom leva parelha nengumha denúncia, sançom ou juízo para castigar @s autor@s de modo exemplarizante e dissuasório para o resto do estudantado que questionar o actual ordenamento político universitário.É por isso que, perante a apariçom de qualquer protesto inócuo, se nom se conhece @ autor, se costume a incriminar arbitrariamente qualquer pessoa com militáncia conhecida. Noutras notícias como a anexada na ligaçom inferior, de Ceivar temos analisado o carácter parapolicial que Prosegur cumpre em diversas universidades galegas,cuja leitura recomendamos repassar. Exigimos do tribunal em questom a absoluçom do independentista imputado,assi como o cessamento dos processamentos arbitrários contra o Independentismo.