BNG, MpDC e AI interessam-se polas últimas incidências na repressom contra o Independentismo

Os acontecimentos repressivos dos últimos dias estám a desatar, além de perplexidade, indignaçom e temor nos sectores sociais menos advertidos sobre a realidade da situaçom em matéria de liberdades, umha vaga de solidariedade inusual que vai além da identificaçom política com as pessoas repressaliadas. Assi, por exemplo, o parlamentar do BNG Bieito Lobeira apresentava antonte na câmara da CAG umha iniciativa solicitando o esclarecimento da intervençom policial contra manifestantes solidári@s com a Palestina e exigindo responsabilidades. Lobeira define a actuaçom policial do dia 21 de “absolutamente desproporcionada”. Em idêntica direcçom se define a associaçom afim ao Bloco Movimento polos Direitos Civis. O MpDC avonda na tese da “desproporçom” e assegura que solicitará perante as “instituiçons pertinentes” a investigaçom dos factos que seguírom às detençons da Carreira do Conde. Asseguram da associaçom cívica que “cada dia, os agentes de Forças e Corpos de Segurança do Estado agem de maneira desproporcionada, vulnerando a lei e atentando contra os direitos dos cidadáns”. Finalmente, a associaçom anuncia que “solicitará que se investiguem todas e cada umha das actuaçons dos polícias que intervírom nesta operaçom”. Percepçom de que o MLNG está no alvo da repressom ultrapassa os círculos afectados Por sua parte, também a ONG Amnesty International tivo conhecimento dos sucessos ocorridos na esquadra policial de Compostela na noite do dia 21 e pujo-se em contacto com os jovens detidos e agredidos pola Polícia espanhola nessa jornada. Amnesty International recebeu directa e cumprida informaçom e imagens gráficas sobre o tratamento policial recebido por ambos independentistas que utilizará para desenvolver as iniciativas que considerar oportunas. Embora, à vista da impunidade objectiva com que se desenvolve no Estado espanhol a repressom em esquadras, quartelilhos e centros penitenciários, nom podamos fazer umha outra cousa que exprimir um grande cepticismo a respeito da virtualidade final das hipotéticas investigaçons e denúncias, também promovidas por nós, consideramos altamente positivo o interesse demonstrado polas instáncias apontadas, assi como outras nom citadas aqui, porquanto reflite com claridade que a percepçom de que o MLNG é objecto dumha política de excepçom sovardou os limites do contorno político directamente afectado e mobiliza mais sensibilidades que as que som alvo da repressom.