Espanha e Portugal afundarám na cooperaçom policial e judicial na XXII cimeira interestatal

A XXII cimeira hispano-lusa a celebrar na localidade espanhola de Badajoz reunirá a partir de amanhá as delegaçons governamentais portuguesa e espanhola sob umha apretada agenda que se tratará o desenvolvimento do mercado eléctrico e gasístico, a cooperaçom turística, as infraestruturas, a cooperaçom policial e judicial transfronteiriça e aspectos da agenda internacional. À reuniom entre o primeiro ministro português José Sócrates e o seu homólogo espanhol Rodríguez Zapatero assiste como convidada umha delegaçom da administraçom autonómica. Embora o grosso dos pontos da cimeira que transcendérom publicamente afecta ao mundo dos negócios e a situaçom europeia e internacional, ambas delegaçons estatais do máximo nível integram entre os seus respectivos membros os ministros de Interior, Justiça e Defesa, facto indicativo de que economia e infraestruturas nom serám os únicos pontos a abordar. Segundo informárom diversos meios, o controlo da fronteira luso-‘espanhola’ será um dos elementos de importáncia na cimeira. Contodo, a informaçom a respeito desta questom nom deixa de ser escassa e inconcreta.