Concelho da Corunha instala ilegalmente câmaras para o controlo da cidadania

O Concelho da Corunha está a cometer graves irregularidades na colocaçom de câmaras de vigilância em vários pontos da cidade. A instalaçom de câmaras sem permisso da Delegaçom do Governo espanhol, a utilizaçom de aparelhos nom previstos em certos lugares, o emprego de pessoal nom autorizado para manipular os engenhos, etc. som algumhas das irregularidades produzidas. O Movimento polos Direitos Civis denuncia na sua página web estas irregularidades, que estariam confirmadas pola Delegaçom do Governo espanhol, aduzindo esta que nom tem conhecimento da vulneraçom da legalidade. O MpDC menciona aliás numerosas denúncias de cidadáns de que se estava instalando em praças da cidade câmaras legalmente destinadas à estaçom de autocarros, ou bem que o videocontrolo desta última seria levado por pessoal do Concelho, e nom pola Policia espanhola, única autorizada para estas tarefas, segundo a Lei Orgánica 4/1997. O MpDC solicita a retirada das câmaras e pide que se sancione o Concelho da Corunha polas vulneraçons da legalidade vigente, afirmando que também cursará umha denúncia ante a Fiscalia do Estado e ante a ‘Agencia Española de Protección de Datos’. À já rejeitável e anti-democrática decisom de vigilar à cidadania a meio de dispositivos de espionagem, une-se-lhe agora a falta de respeito e a vulneraçom das normas que regulam este tipo de controlo. Normas que som instituidas pola própria Administraçom espanhola, e que ela mesma incumpre passando por cima de todo rigor legal. Como noutras cidades e vilas galegas, a extensom da video-vigilância nom é só para aumentar a eficiência da luita contra os ‘delitos’, é um plano de actuaçom perfeitamente desenhado para criar umha sensaçom de falta de intimidade na cidadania e lograr que as pessoas assumamos que o poder vai ter pleno controlo informativo das nossas vidas.