Justiça espanhola processa o direito à greve na pessoa do sindicalista da CIG Carlos Vázquez

A Justiça espanhola volve encenar a sua natureza classista. Segundo informavamos na passada terça-feira, o dia 25 tivo lugar a vista dos recursos de apelaçom apresentados polo sindicalista da CIG Carlos Vázquez, acusado dumha acçom violenta no decurso dum piquete na Greve Geral de 20 de Junho de 2002 em Ourense. Um nutrido grupo de trabalhador@s concentrou-se em solidariedade com o dirigente da central galega às portas do Paço de Justiça da cidade auriense. A concentraçom de solidariedade com o membro da Executiva Comarcal da CIG dou passo a umha vista que evidenciou a beligeráncia da Fiscalia face o direito à greve. “É um comportamento contra a classe operária e durante o juízo todos pudemos escuitar como se assanhou contra o direito à greve”, declarou Carlos Vázquez em relaçom à Fiscalia. “Este tipo de atitudes deixa claro o seu ódio face a classe obreira, e é que já gostariamos de que agissem nos mesmos termos quando há acidentes laborais ou outro tipo de atropelos gravíssimos contra os direitos dos trabalhadores”, remachou. Finalmente, Carlos Vázquez agradeceu o apoio recebido por tod@s @s companheir@s da CIG, manifestando que este foi “umha mostra de unidade e camaradagem muito importante”. Pode-se consultar informaçom completa sobre o processo repressivo no web da central nacionalista que anexamos ao pé desta notícia.