Guardas civis reproduzem no seu web informaçom aparecida neste portal sobre a sua relaçom com a direcçom do BNG

Tinhamos conhecimento das visitas que o Ministério de Interior realiza quase diariamente a este sítio web e da utilizaçom da informaçom que facilitamos em processos judiciais contra independentistas. Contodo, desconheciamos que a força de ocupaçom espanhola reproduzisse nos seus próprios webs sob o título de ‘Imprensa’ as notícias publicadas por Ceivar nas que se denuncia a interrelaçom entre a direcçom do nacionalismo institucional e o instituto armado espanhol. A página da delegaçom crunhesa da ‘Asociación Unificada de Guardias Civiles’ reproduz no apartado citado diversas informaçons publicadas em www.ceivar.org. Concretamente, trata-se das notícias referidas às reunions mantidas, respectivamente, entre o porta-voz nacional do BNG Anxo Quintana e a autodenominada ‘Asociación de Guardas Civis de Galicia’, cujo porta-voz é o militar Manuel Mato, por umha parte, e a ‘Asociación Unificada de Guardias Civiles’ na CAG, liderada por José Díaz Castelo, por outra. Estas informaçons aparecem colocadas na data de 30 de Junho de 2006 respeitando-se na íntegra o texto e a normativa empregadas. Embora apenas sirvam para refrescar a memória histórica, ou dá-las a conhecer para quem nom as tivessem lido, recomendamos a sua leitura através do linque que colocamos ao pé desta notícia.