Mais um ano, os partidos institucionais dérom mostras de subordinaçom ao atávico rito espanhol de demonstrar submissom e reconhecimento à Guarda Civil no ‘Día de la Hispanidad’. A participaçom municipal foi maciça nas homenagens programadas ao igual que a assistência a cerimoniais católicos e aquartelamentos. Embora @s edis das formaçons espanholas demonstravam umha posiçom unánime, parte dos alcaldes e concelheiros do BNG apostárom na assistência aos actos. Apesar de que a nossa logística informativa nom permite o detalhe pormenorizado sobre a participaçom dos representantes municipais do BNG nos actos de homenagem à Guarda Civil, si temos constáncia de casos concretos. Segundo aponta a ediçom de ‘Carvalho’ de La Voz de Galicia, o alcalde desta vila, Evencio Ferrero (BNG), acodiu à celebraçom católica e a reuniom na casa quartel de Carvalho. Ferrero qualificou a celebraçom de “aleatória” no termo municipal que governa e lamentou-se de que “este ano nom se celebrou umha verbena que completasse o dia de festa, depois dos outros actos” (sic). Também na Estrada Também o histórico regedor de Corcubiom polo BNG, Rafael Mouzo Lago, actualmente concelheiro na oposiçom, acodiu à casa consistorial de Cée para participar no acto de homenagem à Guarda Civil. Aliás, a ediçom de Taveirós-Terra de Montes de Faro de Vigo informa da participaçom no ‘Día del Pilar’ dos edis nacionalistas estradenses Noa López Calvelo e Xoán Carlos Castro que figérom acto de presença nos actos celebrados na localidade de Taveirós. Carecemos à hora de redigir-se esta informaçom de mais notícias contrastadas que nos permitam dimensionar a amplitude com que se manifestou em 2006 a adesom de edis e regedor@s do BNG à Guarda Civil, embora todo indica que ‘naturalizar’ a presença do instituto armado espanhol no nosso País e estabelecer relaçons de normalidade institucional é a opçom escolhida por importantes sectores do nacionalismo estatutista, já nom apenas na sua direcçom, como é visível, mas também numha parte das suas bases municipais.