A festividade da organizaçom armada espanhola serviu na Arousa, segundo assegura a jornalista Pilar Manteca do ‘Diario de Arousa’, para anunciar a construçom dumha nova casa quartel em Vila Garcia com competência sobre Vila Nova, A Ilha e Catoira. As dependências militares localizarám-se num solar de Fonte Carmoa cedido pola câmara municipal que dirige o ‘socialista’ Joaquín Javier Gago López. O capitám do posto José María Rancaño anunciava onte o iminente início da redacçom do projecto para a construçom da nova casa quartel. Técnicos enviados de Madrid visitarám nos próximos dias o terreno para a realizaçom das provas topográficas prescritas. O projecto custará ao erário público 2.3 milhons de euros e espera-se a sua posta em funcionamento para finais de 2009. Rancaño nom esqueceu agradecer às autoridades municipais de Vila Garcia a sua boa disposiçom face “esta reivindicada e necessária infraestrutura” e assegurou que o governo local “volcou-se a cem por cem e pujo todas as facilidades possíveis para que este projecto poda levar-se a cabo”. Competência policial num ambito de 54.000 pessoas Por último, o militar espanhol qualificou de “adequado” o número de números da sua companhia por ajustar-se ao catálogo do Ministério de Interior. Segundo anunciou, trata-se de 60 agentes com competências de intervençom sobre 54.000 pessoas aproximadamente. Os actos de homenagem à organizaçom armada espanhola celebrárom-se nos salons do Licéu-Casino da localidade aos que acodírom porta-vozes municipais, Polícia espanhola, Polícia local, empresários e “representantes da vida social”. Rancaño reafirmou ante os presentes “umha vez mais o orgulho que sentimos polo que fazemos e por todo o que damos polos demais” (sic). “Trabalhamos para vós. É um prazer e esperamos seguir fazendo-o muitos anos mais”, concluiu o capitám estrangeiro.