Ameijeiras Vales evidencia em Vergondo a forte aposta do PSOE em favor da Guarda Civil

A informaçom ‘oficial’ agacha diariamente entre a moreia de siléncios, tergiversaçons, falsificaçons e palha umha quantidade importante de dados e notícias que bem interpretados nos podem dar umha ideia donde estamos. A homenagem à Guarda Civil celebrada ontem solenemente no Paço de Marinhám (Vergondo) achegava, por boca do porta-voz do Estado espanhol na Galiza administrativa, Manuel Ameijeiras Vales, um dado revelador da forte aposta que o PSOE está a fazer na organizaçom armada espanhola. Segundo Ameijeiras, os orçamentos assignados ao instituto armado espanhol acrescentarám a sua quantia em 15.2% a respeito do exercício 2006. O importante salto qualitativo que se produz no financiamento por parte do Executivo de José Luis Rodríguez Zapatero nom fica ai. Aliás, Ameijeiras fijo saber perante os agentes em formaçom que nos dous primeiros anos da legislatura ‘socialista’ a oferta pública de emprego na Guarda Civil fora de 8000 vagas e anunciou que se acrescentará em quase 3000 as correspondentes a promoçons internas. Convénio com a FEMP “Nom só estamos aumentando o número de guardas”, apontou satisfeito Ameijeiras Vales, “senom que também haverá mais oficiais e suboficiais”. Aliás, o delegado espanhol na Galiza administrativa anunciou que os salários dos agentes da força de ocupaçom aumentarám 6.16% para 2007. Ameijeiras tivo palavras para a recente criaçom por parte do Executivo de Madrid dumha única direcçom geral para os dous corpos repressivos espanhóis e assegurou que “supom umha potencializaçom da direcçom e a coordenaçom de ambos”. Por outra parte, Ameijeiras anunciou também como exclusiva em Marinhám que “dentro de pouco se assinará um convénio com a Federaçom Espanhola de Municípios e Províncias para implicar ao máximo” os corpos policiais municipais na interrelaçom e coordenaçom com as FSE. Apontar, por último, no apartado cómico da celebraçom, que o general de brigada ao mando da ‘zona’ da Galiza, Manuel Ferreiro Losada, parabenizou os seus homes e mulheres polo trabalho realizado na crise incendiária de Agosto e exclamou que “Também os guardas civis sabemos dizer ‘Nunca Mais’”. Aliás, Losada demandou “colaboraçom” para defender “o nosso paraíso” em referência ao território no que operam as unidades que dirige.