Em mais de umha ocasiom denunciamos neste portal e na publicaçom CISALHA a fluida relaçom existente entre partidos institucionais e Guarda Civil. Umha relaçom que evidencia as submissons do sistema de partidos ao poder militar e da que, infelizmente, nom se vê livre o nacionalismo estatutista. Assistência apologética a festejos militares, consideraçom da organizaçom armada espanhola como ‘serviço social’ e implicaçom de partidos, concelhos e administraçons nas suas necessidades dam mostra dumha vassalagem que nos retrotrai à Longa Noite de Pedra. Procurando titulares ao abeiro da festa nacional espanhola, os deputados autonómicos do PSdeG-PSOE Antón Louro Goyanes e José Manuel Lage Tuñas, agiam nesta semana perante Madrid como porta-vozes oficiosos dos interesses do instituto armado espanhol na Galiza e visitavam onte o seu destacamento militar em Outes (Muros-Noia) para entrevistar-se com o sargento-chefe, José Mato, e informá-lo sobre as gestons que desenvolvem perante o Ministério de Interior para lograr o investimento de 400.000 euros na reforma integral do citado quartel. O objectivo dos ‘socialistas’ é que as obras se executem com cargo aos Orçamentos Gerais do Estado de 2007. “Desde o PSOE vamos favorecer a dignificaçom desta unidade, melhorando a sua estrutura e a sua habitabilidade”, declarou o deputado autonómico Lage Tuñas (Outes, 1977). Durante o encontro com o militar espanhol também estivérom presentes Enrique Martínez, secretário da agrupaçom local ‘socialista’, e Manuel Tuñas, porta-voz municipal. Louro e Lage assegurárom que as gestons destinadas a conseguir o investimento foram iniciadas em Setembro passado.