‘Pres@s nacionalistas galeg@s. Resenha histórica 1975-2005’ é o título do livro que o nosso organismo vem de editar coincidindo com a IV ediçom do Dia da Galiza Combatente, data na que homenageiamos todas as pessoas que ao largo da nossa história fôrom objecto da repressom, a tortura, o cárcere e a morte como resultado do seu compromisso com a liberaçom nacional e social do nosso País. O material que aginha começará a sua distribuiçom através de livrarias e locais sociais nacionalistas de toda a naçom iniciava a sua confeiçom em 2004. O texto inicial redigia-se sem pretensons de ser publicado como material de apresentaçom do organismo popular anti-repressivo nas jornadas do ‘Congresso Internacional de Solidariedade com @s Pres@s Polític@s’, celebrado em Euskal Herria em Maio de 2004 e ao que assistiu em representaçom da Galiza umha delegaçom de Ceivar. Recordamos que, como resultado daquela presença, todas as delegaçons internacionais exigiram a liberdade do patriota galego Manuel Quintáns, preso na altura no macrocárcere de alta segurança de Teixeiro. Amplamente documentado Posteriormente, e dado o facto de aquel material ser a primeira recopilaçom histórica sobre a repressom contra a militáncia do MLNG, o texto base foi enriquecido com achegas de ex pres@s independentistas, os organismos anti-repressivos CAR e JUGA e pessoas ligadas às etapas abordadas, resultando finalmente umha ediçom muito completa sobre a temática que se trata. Embora falarmos dum trabalho de autoria colectiva, nom podemos deixar de citar aqui o labor fundamental de recopilaçom de informaçom e testemunhos desenvolvido polo militante independentista Antom Garcia Matos, sem cujo característico tesom a apariçom deste material nom teria sido possível. O material que hoje editamos abrange portanto o período histórico que vai desde a vaga repressiva dessatada em Agosto de 1975 contra a Uniom do Povo Galego (UPG) até a celebraçom em Dezembro de 2005 dumha mobilizaçom nacional em denúncia da repressom de que, agora mesmo, é objecto a mocidade independentista organizada. Dado que a nossa intençom ao editar o presente material nom é obter um ganho económico, o documento disponibilizará-se proximamente em Internet em formato pdf para todas aquelas pessoas que desejem consultá-lo. A redistribuiçom e fotocopiado é livre, embora solicitamos se cite a fonte.