O comissário provincial de Ponte-Vedra, José Manuel Salgado, lamentava ontem o incremento de atitudes hostis cara aos polícias. Parecem-lhe moi preocupantes as atitudes das pessoas que lembram aos agentes policiais que som @s contribuintes quem lhes pagam, e qualifica de ‘desfachatez’ que existam grupos de pessoas que se acheguem às esquadras policiais a pedir a libertaçom de detid@s. Evidentemente, nom mencionou os numerosos casos de detençons ilegais, repressom política e social, atitudes racistas, extralimitaçons nas funçons, etc. que formam parte da imagem que a cidadania tem do sistema policial. Fica claro que, como em épocas passadas, o trabalho policial pretende efectuar-se utilizando um arma poderosa: o medo. Por outra banda, dentro dos contínuos ataques contra o independentismo por parte dos meios de comunicaçom, destacam pola sua viruléncia os realizados polo jornal da extrema direita espanhola “La Razón”. Na ediçom do dia 25 de Setembro, publicam umha entrevista com o chefe superior da Polícia na Galiza, Luís Manuel García Mañá, onde menciona a necessidade de “rematar dumha vez com essas pequenas audiencias juvenis que escoitam a sua mensagem” (referindo-se a um suposto líder de grupos radicais violentos) “e abraçam a luita contra a democracia”. Menciona também a coordenaçom cos meios de comunicaçom, que ficam reduzidos a instrumentos das suspeitas policiais de turno, o que confirma que a vaga de difamaçons e intoxicaçons verquidas ultimamente por alguns meios tem umha origem policial. Na ligaçom inferior pode-se ver a entrevista ao completo. Resultam preocupantes as declaraçons destes altos mandos policiais, onde palavras como ‘desfachatez’, ou enigmáticas expressons como ‘rematar dumha vez com essas audiências juvenis’, parecem indicar que nem a democracia nem o seguimento das suas normas se tenhem instalado nos seus sistemas de pensamento, e onde se asume que os meios de comunicaçom, junto com os sistemas judicial e penitenciário, formam parte do mesmo desenho repressivo.