A Comissom de Denúncia da Galiza, agrupaçom de colectivos contra a tortura e os maus tratos por parte das instituiçons e as FSE em que o nosso organismo anti-repressivo participa, convoca umha concentraçom perante o compostelano edifício do SERGAS para exigir responsabilidades pola morte do preso Xosé Tarrio em Janeiro de 2005 a causa das negligências médicas. A concentraçom celebrará-se amanhá 27 de Setembro a partir das 12:00 h. Xosé Tarrio foi um dos presos mais destacados na luita anticarcerária desde o interior das instituiçons penitenciárias. Foi precisamente este compromisso o que provocou que dos 14 anos passados em prisom a partir dumha condena inicial de dous e meio, doze estivesse num duro regime de isolamento. Portador e enfermo do VIH desde 1989, Xosé nom recebeu o tratamento ajeitado, inclusivamente quando já contava com meio corpo paralisado. Os serviços médicos do centro penitenciário de Teixeiro receitaram-lhe na altura umha aspirina, assegurando que “o único que lhe passava era que tinha gripe”. Vários meses depois, era ingressado no hospital Juan Canalejo de Crunha onde um outro erro no diagnóstico acelerava e provocava a sua morte. Nem a doença terminal que Xosé padecia fijo com que os seus custódios respeitassem os seus direitos mínimos e a dignidade pola qual este preso luitara sempre, da cadeia, em favor das pessoas presas; como mostra, o exemplo de terem-no atado à cama do hospital, estando já sem mobilidade corporal. De Ceivar apelamos para a participaçom neste novo acto reivindicativo da Comissom de Denúncia contra a tortura e os maus tratos. A cita é amanhá 27 de Setembro a partir das 12:00 h. perante o edifício administrativo do Sergas em Sam Láçaro (Compostela).