Agentes da Polícia espanhola firem mariscadores de Ferrol trás cargar contra umha mobilizaçom laboral

A Polícia espanhola volveu fazer honor à sua trajectória e funcionalidade precisamente num lugar emblemático para a repressom como é a Ponte das Pias de Ferrol. Agentes do corpo repressivo espanhol carregavam esta tarde contra os mariscadores de Trasancos que curtavam o tránsito rodado na citada via de acesso à cidade departamental. O protesto dos operários deve-se à classificaçom da Ria como ‘Zona C’ de marisqueio que impede a venda directa em lonja do produto como faziam até agora. A paralisaçom do viaduto efectivou-se colocando pneumáticos ardendo em Fene e Ferrol durante perto dumha hora. De manhá, umha marcha dos 200 mariscadores do pósito ferrolano protestava contra a normativa da UE que classifica os bancos de marisco em funçom da qualidade das águas. Efectivos ‘antidistúrbios’ da Polícia espanhola atacárom os operários na estrada de Castela arredor das 10:00 da manhá ferindo a cinco pessoas. Segundo informaçons que nom pudemos comprovar, um dos agredidos foi golpeado na caluga e num dedo sendo objecto de diversos lesons. De Ceivar queremos assinalar o facto paradoxal de que, enquanto as administraçons ‘responsáveis’ polo estado actual da Ria de Ferrol nom oferecem alternativas aos trabalhadores perante a declaraçom de ‘Zona C’, a Polícia espanhola tenha aplicado mais umha vez a única política que conhece. Manifestamos de aqui a nossa solidariedade com os companheiros agredidos e exigimos a retirada do corpo repressivo da comarca de Trasancos. Seguiremos informando.