A repressom sindical e sócio-laboral nos centros de trabalho da Galiza é umha realidade tam quotidiana quanto desconhecida, silenciada além dos muros das empresas e inabrangível para o seu tratamento por qualquer meio informativo nom subordinado aos interesses patronais. De ceivar.org estamos tratando de mostrar casos concretos que apenas assinalam a ponta dum icebergue de arbitrariedade e vulneraçom sistemática de direitos fundamentais que, no entanto, se compatibiliza no plano público com a retórica da democracia e as liberdades públicas. Mapfre e Caja Madrid som as empresas que saltavam recentemente aos meios sindicais por exercer a repressom surda e permanente da massa assalariada galega. A candidata da central nacionalista CIG às eleiçons sindicais celebradas em Julho passado era despedida do seu posto de trabalho na que é a enésima perseguiçom contra o sindicalismo nacionalista, segundo denuncia a CIG no seu web onde assinala “a hipocrissia destas empresas”. Actos de protesto contra a repressom Os passados dias 18 e 23 de Agosto a central nacionalista celebrava duas concentraçons de denúncia da repressom perante os escritórios de Mapfre e Caja Madrid na capital galega. Segundo a Federaçom de Serviços da CIG na comarca de Compostela, o despedimento da sindicalista supom “um claro aceno de repressom sindical”, ao tempo que assegura que “vamos combater com todos os meios ao nosso alcanço, sendo estes actos o começo das mobilizaçons contra Mapfre e Caja Madrid”. Do nosso portal seguiremos dando cobertura informativa na medida das nossas possibilidades à denúncia da repressom produzida diariamente nos centros laborais do País, conscientes de que é precisamente nesses ámbitos de ‘déficit democrático’ absoluto onde se aliciona quotidiana e maciçamente a cidadania galega na autocensura, a subordinaçom e a renúncia ao exercício dos direitos e liberdades mais elementares. Aliás, queremos parabenizar a iniciativa d@s trabalhador@s de denunciar a repressom e faze-la deste modo assinalável e combatível.