Ceivar soma a sua voz ao protesto nacional contra o terrorismo incendiário de raiz empresarial

O trabalho anti-repressivo nom pode ficar indiferente perante os reptos globais de todo o tipo que impom para o futuro do nosso País a sua constante deterioraçom sócio-económica, identitária e ambiental. A crise nacional que estamos a viver por causa do terrorismo ecológico de raiz empresarial -turistificaçom, especulaçom imobiliária, construçom e generalizaçom do cultivo de espécies florestais de crescimento rápido- nom deixa impassíveis a quem fazemos da luita contra a repressom a nossa razom de ser. É por este motivo que hoje publicamos no nosso web o manifesto ‘Defendamos os nossos montes. Esta barbárie também tem responsáveis políticos’ ao que Ceivar aderiu ontem para criar a Plataforma contra os Incêndios, assinado até o de agora por Mulheres Nacionalistas Galegas, Esquerda Unida, Mulheres Transgredindo, Nós-Up, Assembleia da Mocidade Independentista, Agir, Ceivar e Briga. O manifesto continua aberto a quem se quiger somar e vários colectivos sociais estudam ainda a sua incorporaçom. Aliás, aderimos a nossa voz à mobilizaçom nacional convocada para amanhá domingo em Compostela a partir das 12:00 h. da manhá. A seguir publicamos na íntegra e nas duas normativas existentes o citado manifesto DEFENDAMOS OS NOSOS MONTES ESTA BARBARIE TAMÉN TEN RESPONSÁBEIS POLÍTICOS Tres anos despois do atentado ambiental do Prestige, voltamos a sofrer un ataque de tremendas proporcións contra o País. Ataque que agride directamente a sua poboación, o ecosistema, o habitat, a cultura e o futuro dos e das galegas. Tres anos depois da marea negra, unha mestura explosiva de intereses políticos, económicos predadores e incompetencia política, unida aos problemas estruturais do monte galego causados por unha prolongada e ineficaz ordenación do territorio, unha errada política de reforestación e unha xestión do agro galego negativa, sacrifican o porvir de toda a poboación. Da Plataforma contra os incendios forestais queremos denunciar: 1- Que a intencionalidade dos lumes non se debe unicamente a psicópatas, vándalos ou despistados. Hai un plano perfectamente orquestrado para liquidar a poboación e calquera futuro dos nosos montes e do noso agro. 2- Esta situación non é casual. A política forestal desenvolvida desde os anos corenta, baseada no monocultivo do eucalipto e do piñeiro, empobrece e limita a potencialidade do monte galego e crea o sustento perfecto para o terrorismo forestal. 3- Que a vaga de lumes, nas últimas décadas, coincide co abandono do rural e dos usos tradicionais do complexo agro-gandeiro-forestal, impulsada polo Estado español co beneplácito da Unión Europea, e portanto co avanzo das masas forestais homogéneas e pirófitas. 4- Que as zonas agredidas nestes últimos tempos son as mais cobizadas por grandes e medianos especuladores, que preparan o asalto aos PGOM de múltiplas comarcas occidentais galegas e soñan cun porvir de turistificación e urbanización especulativa. 5- Que a Lei de montes que restrinxe a urbanización nen se aplicou ainda, nin evita a urbanización do solo rústico incendiado. 6- Que o PP, como principal apoio político desta estratexia económica e deste deseño forestal, pratica a hipocrisia pura e dura ao lavar as mans e esquecer a súa responsabilidade incendiaria onte e hoxe. Que o Goberno bipartido do PSOE-BNG pratica a verborrea fácil ao insistir na linguaxe da ‘guerra’ e da solución policial: o seu medo crónico non lle permite asinalar as forzas responsábeis por esta desfeita, nin confesar que a sua ‘prevención’ dun ano foi pura fraude, rendido ao poder dos de sempre. A Xunta é responsábel política directa pola actual catástrofe ambiental por perpetuar as políticas forestais e a industria do lume do fraguismo, por carecer de medios e recursos suficientes para o combater. ESIXIMOS: – Que desde o goberno galego se asinale os verdadeiros culpábeis desta desfeita e non fique todo nunha farsa con que enganar a poboación e manter así intactos os intereses e o poder dos de sempre. – Explicaçom exhaustiva á poboación das investigacións e detencións que se están a producir. (Non podemos esquecer que hai catro persoas asasinadas por estes terroristas do lume). – A identificación (con nome e apelidos) dos orquestradores últimos deste ataque directo contra o País e a sua poboación. – Legislación clara sobre as superficies queimadas onde se contemple expresamente: · Imposibilidade de recualificar os terrenos incendiados. · Prohibición absoluta de repoboación con especies foráneas. · Prohibición de instalar parques eólicos nos montes arrasados polo lume. – Dispor dos mecanismos de control necesarios para que ninguén saia beneficiado desta catástrofe forestal. – Creación desde xa dun grupo de traballo em que estexan implicadas tanto o persoal técnico correspondente, as comunidades de montes, as organizacións ecoloxistas, así como a poboación que vive nas zonas afectadas para deseñar o plano de reforestación dos nosos montes, pois este é o momento para facer as cousas ben e non hai posíbeis escusas. Chamamos ás e aos galegos/as conscientes da barbarie que nos asola: – A envolverse nun movemento asembleario amplo e abranxente de denuncia dos culpábeis, de presión e esixencia de responsabilidades ás autoridades autonómicas, e de oposición aos planos urbanizadores e eucaliptizadores avalizados por un poderoso conglomerado empresarial. – A reivindicar a recuperación do noso rural e da diversidade de usos dos nosos montes como garantía para evitarmos no futuro os incendios. Uns montes que produzan biomasa e madeira de especies diversas, e que sirvan de apoio á produción agraria nun rural habitado. GALIZA EN PÉ CONTRA O LUCRO DO LUME! Compostela, 20 de agosto de 2006 Plataforma contra os incendios forestais DEFENDAMOS OS NOSSOS MONTES ESTA BARBÁRIE TAMBÉM TEM RESPONSÁVEIS POLÍTICOS Três anos depois do atentado ambiental do Prestige, voltamos a sofrer um ataque de tremendas proporçons contra o País. Ataque que agride directamente a sua populaçom, o ecossistema, o habitat, a cultura e o futuro dos e das galegas. Três anos depois da maré negra, umha mistura explosiva de interesses políticos, económicos predadores, e incompetência política, unida aos problemas estruturais do monte galego causados por umha prolongada e ineficaz ordenaçom do território, umha errada política de reflorestaçom e umha gestom do agro galego negativa, sacrificam o porvir de toda a populaçom. Da Plataforma contra os incêndios florestais queremos denunciar: 1- Que a intencionalidade dos lumes nom se deve unicamente a psicopatas, vándalos ou despistados. Há um plano perfeitamente orquestrado para liquidar a populaçom e qualquer futuro dos nossos montes e do nosso agro. 2- Esta situaçom nom é casual. A política florestal desenvolvida desde os anos quarenta, baseada no monocultivo do eucalipto e do pinheiro, empobrece e limita a potencialidade do monte galego e cria o sustento perfeito para o terrorismo florestal. 3- Que a vaga de lumes, nas últimas décadas, coincide com o abandono do rural e dos usos tradicionais do complexo agro-gadeiro-florestal, impulsionada polo Estado espanhol com o beneplácito da Uniom Europeia, e portanto com o avanço das massas florestais homogéneas e pirófitas. 4- Que as zonas agredidas nestes últimos tempos som as mais cobiçadas por grandes e medianos especuladores, que preparam o assalto aos PGOM de múltiplas comarcas ocidentais galegas e sonham com um porvir de turistificaçom e urbanizaçom especulativa. 5- Que a Lei de montes que restringe a urbanizaçom nem se aplicou ainda, nem evita a urbanizaçom do solo rústico incendiado. 6- Que o PP, como principal apoio político desta estratégia económica e deste desenho florestal, pratica a hipocrisia pura e dura ao lavar as maos e esquecer a sua responsabilidade incendiária ontem e hoje. Que o governo bipartido do PSOE-BNG pratica a verborreia fácil, ao insistir na linguagem da ‘guerra’ e da soluçom policial: o seu medo crónico nom lhe permite assinalar as forças responsáveis por esta desfeita, nem confessar que a sua ‘prevençom’ de um ano foi pura fraude, rendido ao poder dos de sempre. A Junta é responsável política directa pola actual catástrofe ambiental, por perpetuar as políticas florestais e a indústria do lume do fraguismo, por carecer de meios e recursos suficientes para o combater. EXIGIMOS: – Que do Governo galego se assinale os verdadeiros culpáveis desta desfeita e nom fique todo numha farsa com que enganar a populaçom e manter assim intactos os interesses e o poder dos de sempre. – Explicaçom exaustiva à populaçom das investigaçons e detençons que se estám a produzir. (Nom podemos esquecer que há quatro pessoas assassinadas por estes terroristas do lume). – A identificaçom (com nome e apelidos) dos orquestradores últimos deste ataque directo contra o País e a sua populaçom. – Legislaçom clara sobre as superfícies queimadas onde se contemple expressamente: · Impossibilidade de requalificar os terrenos incendiados. · Proibiçom absoluta de repovoaçom com espécies foráneas. · Proibiçom de instalar parques eólicos nos montes arrasados polo lume. – Dispor dos mecanismos de controlo necessários para que ninguém saia beneficiado desta catástrofe florestal. – Criaçom desde já de um grupo de trabalho em que estejam implicadas tanto o pessoal técnico correspondente, as comunidades de montes, as organizaçons ecologistas, assim como a populaçom que vive nas zonas afectadas para desenhar o plano de reflorestaçom dos nossos montes, pois este é o momento para fazer as cousas bem e nom há possíveis escusas. Chamamos às e aos galegos/as conscientes da barbárie que nos assola: – A envolver-se num movimento assemblear amplo e abrangente de denúncia dos culpáveis, de pressom e exigência de responsabilidades às autoridades autonómicas, e de oposiçom aos planos urbanizadores e eucaliptizadores avalizados por um poderoso conglomerado empresarial. – A reivindicar a recuperaçom do nosso rural e da diversidade de usos dos nossos montes como garantia para evitarmos no futuro os incêndios. Uns montes que produzam biomassa e madeira de espécies diversas, e que sirvam de apoio à produçom agrária num rural habitado. GALIZA EM PÉ CONTRA O LUCRO DO LUME! Compostela, 20 de Agosto de 2006 Plataforma contra os incêndios florestais