Cumprimos o primeiro aniversário da nossa presença informativa constante na Internet

Tal dia como hoje, há agora um ano, o organismo popular anti-repressivo Ceivar abria umha nova frente de intervençom: a presença regular na rede. Durante estes doze meses de trabalho informativo conseguimos manter a denúncia constante dos principais processos repressivos ocorridos no País, nom apenas os referidos a pessoas, organizaçons e colectivos vinculados ao MLNG, que configurárom o grosso da nossa prática informativa, mas também aqueles que pugérom no seu alvo os sectores mais activos e contestatários da cidadania galega, os centros de detençom e reclusom, etc. Três centas quarenta e oito notícias (348) fôrom publicadas neste primeiro ano de vida activa do portal www.ceivar.org, enquanto nos encontramos próximos das 6000 visitas mensais (5917 em Junho) e com umha meia de 200 pessoas distintas acedendo diariamente à nossa informaçom (IPs diferenciados). Aliás, o ritmo intermensal de crecimento das visitas foi constante, situando o portal como um modesto referente informativo que deveremos potencializar na denúncia e socializaçom da repressom política e social. Finalmente, figemos deste um bom instrumento para sorteiar a censura da mídia oficial e servir informaçom rigorosa à comunidade nacionalista. Optimizaçom da informaçom Contodo, os nossos resultados no âmbito informativo nom deixam de ser cativos apesar de em momentos pontuais o sítio web ter umha posiçom referencial, como ocorreu com todas as notícias referentes à ‘Operación Castiñeira’ iniciada em 14 de Novembro com a detençom de dez militantes independentistas em todo o País. Com o intuito de ultrapassar estas limitaçons, Ceivar está a publicar em papel e na rede os ‘Informe anti-repressivo mensal’, escolma quase completa e contextualizada dos principais factos noticiáveis ocorridos cada mês. Estes informes anti-repressivos mensais publicam-se no web, enviam-se àquelas pessoas que assim o solicitem ao correio nacional ceivar@ceivar.org e distribuem-se debalde nos locais sociais e estabelecimentos hostaleiros nacionalistas de todo o País. Finalmente, continuamos com a ediçom d’A Cisalha, umha publicaçom trimestral de distribuiçom gratuita cujo próximo número estará na rua o próximo Dia da Pátria. Esta folha de contra-informaçom pode ser solicitada também para envio gratuito ao nosso correio nacional.