Quarenta polícias espanhóis desalojam pola força seis sindicalistas da CIG do despacho do director do SVA

A violência volvia fazer ontem acto de presença num conflito sócio-laboral para dirimir a resoluçom deste. Segundo informa hoje o sítio web da CIG, seis sindicalistas da central nacionalista eram desalojados pola força na tardinha de ontem trás ocupar o despacho do director geral do Serviço de Vigiláncia Alfandegueira (SVA). A tentativa dos sindicalistas de negociar directamente com Luis Pedriches o Acordo de Horários Especiais do SVA e ultrapassar o bloqueio da mesa de negociaçom resolvia-se com umha nova intervençom policial. A ocupaçom do despacho institucional fazia-se “à vista de que nom havia nengumha intençom, por parte dos responsáveis para concretar umha entrevista e perante a falta de interlocutores válidos”. No entanto, Pedriches nom era quem se apresentava perante os sindicalistas, mas a directora de Recursos Humanos que, segundo denuncia a CIG, “ameaçou com o desalojamento e com umha oferta dumha possível reuniom ao dia seguinte”. A ameaça fazia-se efectiva com a chegada de quarenta polícias espanhóis e o desalojamento dos sindicalistas passadas as 20:00 da tarde. Porta-vozes da central galega considerárom “um facto gravíssimo” a atitude do director do SVA Luís Pedriche que “demonstrando um talante intransigente e autoritário ordenou a expulsom do despacho duns sindicalistas que tratavam de exprimir-lhe directamente a problemática que atinge ao serviço”, afirmam. Trata-se da primeira ocasiom em que um director geral da Agência Tributária ordena o desalojamento violento de sindicalistas. O web da CIG nom facilita maior informaçom a respeito da intervençom policial e as consequências da mesma nem esta parece ser localizável em nengum outro meio. Informaçom mais detalhada em http://galizacig.com/