Touriño enaltecerá Espanha numha Compostela tomada por efectivos policiais durante o 25-J

Diz-se que em política apenas contam os factos. Se o asserto é real, a seguinte notícia é do mais significativa. Emilio Pérez Touriño foi nomeado hoje Delegado Régio por parte da Coroa espanhola para representar esta no vindouro ‘Día del Patrón de España’, festividade institucional coincidente com a celebraçom do Dia da Pátria. Enquanto a capital galega viva de facto sob um estado policial e milhares de nacionalistas exijam na rua o reconhecimento do direito de Autodeterminaçom, o presidente da administraçom autonómica louvará a ‘pátria común e indivisible’ a meio dum clima de suspensom de direitos e liberdades. A notícia fijo-se pública esta manhá. O rei espanhol teria comunicado a mesma ao interessado e a Xosé Sánchez Bugallo, alcalde da capital galega, tratando-se da primeira ocasiom em que Pérez Touriño representará Espanha nos citados actos institucionais. A nominaçom do presidente autonómico como voz em off da Monarquia espanhola denota a perfeita confiança e sintonia existentes entre o alto funcionário e a Monarquia borbónica até o ponto de esta depositar a sua representaçom institucional na pessoa do nomeado. Suspensom da liberdade de opiniom e circulaçom A celebraçom do ‘Patrón de España’ é umha tradiçom enraizada no franquismo e focada a enaltecer a ‘indivisibilidade da naçom espanhola’. Historicamente, a celebraçom da data institucional coincide com a jornada de luita pola soberania conhecida como Dia da Pátria e manifesta-se na ocupaçom da capital galega por efectivos policiais e umha suspensom significativa de direitos e liberdades que já se pujo de relevo nos últimos dias com a proliferaçom de identificaçons de cidadá(n)s e um incremento notável da presença policial. Segundo informamos a semana passada, o dispositivo policial que envolve a celebraçom do Dia da Pátria irá in crescendo até o próximo 25 de Julho segundo afirmárom fontes policiais. Embora ainda nom se figérom públicos dados quantitativos sobre o operativo, preve-se umha maciça presença de agentes da Polícia espanhola e municipal e umha restriçom importante do direito de circulaçom e da liberdade de expressom e reuniom na linha do ocorrido nos últimos anos.