Agentes da Polícia local de Compostela acossam trabalho político de militantes da AMI

A Polícia municipal de Compostela é mais próxima da Brigada Político-Social do franquismo do que dum suposto serviço público. O corpo repressivo local desempenha de modo permanente desde há anos labores de controlo político, repressom da liberdade de expressom, acossa a militantes e serviços auxiliares da Polícia espanhola com o beneplácito do governo municipal PSOE-BNG. A semana passada os efectivos do 092 ‘sequestravam’ durante umha hora dous militantes da AMI que se dispunham a desenvolver tarefas de propaganda política. Os factos ocorrérom sobre as 5:00 da madrugada quando P. M. P. e A. M. P. advertírom que eram objecto dum seguimento policial. Ambos militantes estám processados no sumário judicial aberto a raiz da ‘Operación Castiñeiras’ desdobrada publicamente pola Guarda Civil desde Novembro passado. O seguimento transformou-se em breve em interceptaçom, paragem do carro que conduziam e apariçom dumha nova patrulha policial para realizar um registo a fundo do veículo que se prolongou desnecessariamente durante umha hora. A legislaçom espanhola permite este tipo de registos policiais de carros sem ordem judicial, razom pola que a sua prática converte-se num meio óptimo para a ingerência policial ou, simplesmente, umha forma mais de acossa e criaçom de moléstias. Os dous militantes da AMI eram ‘liberados’ trás 60 minutos durante os que os polícias locais nom encontrárom qualquer prova ou indício de actividades tipificadas como delitivas. O facto pontual ocorrido a semana passada soma-se no caso de A. M. P. à acossa policial que suporta desde há meses, sendo retido e identificado periodicamente na rua por agentes de diversos corpos repressivos sem existência de qualquer circunstáncia ‘razoável’ para proceder a esta prática. De Ceivar convidamos à militáncia que seja objecto esporádica ou regularmente da acossa policial a por-se em contacto com o organismo anti-repressivo para proceder às acçons jurídicas a que houver lugar como mais um meio de combater esta forma de coacçom individual e repressom. Além do contacto directo com @s companheir@s dos Comités Comarcais de Ceivar, pode-se ligar com nós também através do correio electrónico nacional ceivar@ceivar.org.