EU-IU ‘reivindica’ mais Polícia e Guarda Civil em Ogrobe

A notícia chega-nos com retraso dado que é de 27 de Abril, mas merece a atençom dos factos que som definitivos por cima de palavras e boas intençons: a representaçom de Izquierda Unida em Ogrobe asseverava, há apenas um mês no pleno municipal, que “os indicadores de insegurança cidadá se estám a converter num autêntico lastre social” na localidade do Salnês. EU-IU nom se está a referir no entanto à precariedade laboral maciça, a sinistralidade, as altas taxas de emigraçom, a turistificaçom, etc. que açoutam a comarca, mas restritamente à “insuficiente” presença policial, elemento imprescindível para rematar com a ‘insegurança cidadá’. O grupo municipal ogrobense de EU-IU conclui que o problema é que “a presença policial é insuficiente e deficitária” e recorre à retórica conservadora ao vincar no suposto incremento de agressons e delitos, aumento de tensom na vizinhança, o facto de que “de noite o quartel está encerrado” (sic), etc. para rematar solicitando o aumento da presença policial polas noites, tanto da Polícia espanhola quanto da Guarda Civil, e a reestruturaçom da Polícia local através da nominaçom dum novo cabo policial. Contrariando a sua caracterizaçom como grupo político progressista, EU-IU aposta na repressom e o controlo como “soluçom” aos desequilíbrios gerados polo capitalismo.