Em mais dumha ocasiom trougemos a esta página notícias relativas às deterioradas condiçons higiénico-sanitárias do sistema penitenciário espanhol e o continuado ronsel de morte de pessoas presas que provocam. Nesta ocasiom, a Comissom de Denúncia da Galiza quem incide na questom e convoca para o dia 2 de Junho perante os Julgados de Vigo umha concentraçom para exigir responsabilidades penais sobre a morte do preso Roberto Carlos Gómez González. O falecimento do Roberto Carlos Gómez ‘Peque’ produzia-se na prisom de alta segurança da Lama (Terra de Montes) em 19 de Junho de 2004. O jovem perdia a vida trás passar um dia completo tirado literalmente no pátio do centro penitenciário sem receber qualquer tipo de atençom penitenciária ou assistência médica. Exemplo deste abandono institucional homicida é o facto de que tiveram que ser na altura dous companheiros do preso quem o transportassem até a cela onde falecia. ‘Peque’ tinha 26 anos, levava apenas um em prisom preventiva e ia ser julgado em onze dias. O acto convocado pola Comissom de Denúncia da Galiza foca-se a exigir responsabilidades políticas, sanitárias e penitenciárias sobre a morte do moço, umha vez que apesar de ter transcorrido dous anos do seu falecimento ninguém tem respondido penalmente pola situaçom de absoluto abandono médico que provocou o falecimento. De Ceivar chamamos a participar neste acto e dar a máxima difusom ao cartaz que anexamos.