Segundo informa hoje o sítio web da central nacionalista CIG, a cidade de Vigo mobilizará-se o vindouro dia 23 de Maio para denunciar a repressom policial desatada contra @s trabalhador@s do Metal durante a greve desenvolvida a primeiros de mês. A convocatória partirá às 20:00 h. da Via Norte e percorrerá a rua Urzaiz até a Porta do Sol “com umha soa faixa” na que se exigirám responsabilidades pola “desproporcionada e brutal actuaçom policial”. Recordamos que o passado 8 de Maio efectivos da Unidade de Intervençom Policial –mais conhecidos como ‘antidistúrbios’- às ordens de Manuel Ameijeiras e Delfín Fernández, respectivamente, delegado e subdelegado do Governo espanhol na CAG e na ‘provincia’ de Ponte Vedra, atacavam a mobilizaçom de operári@s do Metal provocando dezenas de pessoas feridas, contusionadas e detidas. A actuaçom dos violentos uniformados dou lugar a umha prolongada batalha por diferentes ruas viguesas entre trabalhador@s e agentes da repressom. Como resultado dos enfrontamentos, trece trabalhadores eram detidos e imputados em diversos processos por ‘desobiência à autoridade’, ‘desordens públicas’, ‘atentado’, etc. que se resolverám nas próximas semanas ou meses e poderiam concluir na imposiçom de sançons económicas e, também, segundo se vem impondo pola via dos factos nos últimos anos, condenas de prisom. A mobilizaçom social adquire portanto maior importáncia porquanto a repressom exercida sobre o Metal viguês nom rematou no dia que a Polícia espanhola organizou a conhecida orgia de violência, mas continua agora nos tribunais espanhóis de Justiça.