Horas após conhecer-se a dispersom do patriota galego Ugio Caamanho à prisom de Cáceres, grupos de voluntári@s de Ceivar respostavam informativamente nas ruas de diversas comarcas do País colocando cartazes e fazendo pintadas contra a nova medida repressiva aplicada polo PSOE e o Executivo de Madrid ao militante galego. Como é norma, a nossa intervençom evidenciou mais umha vez o pésimo estado em que se encontra o exercício da liberdade de expressom na capital galega. Agentes da Polícia municipal de Compostela e efectivos da Brigada de Limpeza local dedicavam-se entre as 02:00 h. da madrugada de hoje e as 09:00 h. a localizar e retirar a totalidade de dez cartazes de notáveis dimensons nos que se informava sobre a transferência de Caamanho a Cáceres e se denunciava a enésima vulneraçom dos direitos penitenciários do preso galego. Novamente, a eliminaçom dos cartazes do organismo realiza-se de forma absolutamente selectiva, é dizer, baseando-se num crítério estritamente político, porquanto cartazes similares situados nas proximidades dos retirados ainda permaneciam esta manhá. De Ceivar continuaremos denunciando através de todos os meios possíveis esta perseguiçom sistemática da Liberdade de Expressom. Advertimos ao governo municipal compostelano, e ao corpo policial colocado às suas ordens e peça essencial na repressom de baixa intensidade contra o tecido associativo independentista e popular, que nom vamos renunciar à rua como espaço de socializaçom de informaçons, convocatórias e projectos. Queremos assinalar também como, enquanto o Conselho de Ministros espanhol decide manter a dispersom ilegal de Giana Rodrigues e Ugio Caamanho, castigando o seu contorno afectivo e sócio-político, o alcalde Sánchez Bugallo procura impedir que estes factos sejam do domínio público.