Amplos dispositivos policiais frente às concentraçons de moç@s anunciadas para esta noite nas vilas e cidades da Galiza

“Medidas especiais de controlo” é a designaçom oficial que anuncia o despregamento na noite de hoje dum amplo dispositivo policial nas localidades da Galiza onde se celebrarám concentraçons multitudinárias de jovens. Dado que na CAG nom existem normativas que proibam o consumo de álcool em espaços públicos, a intervençom policial centrará-se na identificaçom de moç@s suspeit@s de nom alcançar a maioria de idade e o controlo dos ‘distúrbios’. De Madrid estuda-se introduzir reformas legais que proibam a celebraçom destas concentraçons. Segundo a ministra de Sanidade e Consumo, Helena Salgado, o Executivo espanhol projecta aprovar umha normativa que iguale a política ao respeito em todo o Estado. Embora a iniciativa é apresentada por Sanidade, a sua vocaçom recadatória é inegável umha vez que a ‘ilegalizaçom’ do ‘botelhom’ nom acabaria este, mas permitiria os governos municipais abrir umha via de captaçom de recursos através da imposiçom de sançons. Por sua parte, o titular espanhol de Interior, José Antonio Alonso, terciou na polémica criada nos meios por volta do fenómeno juvenil. Alonso assegura que o ‘botelhom’ tem um “alto risco” e apela a governos locais e comunidades autónomas a “manter a ordem ali onde esteja permitido”. Actualmente, som maioria as CCAA e governos municipais que nom permitem o consumo de álcool fora dos locais autorizados que pagam as taxas preceptivas. Cidades e vilas Diversas localidades da Galiza convocam para esta noite concentraçons multitudinárias de jovens. Ponte Vedra, Viveiro, Ogrobe, Cambados, A Corunha, Ferrol, Vigo, etc. som alguns dos pontos para os que as respectivas Subdelegaçons do Governo espanhol preparam dispositivos policiais. Segundo o concelheiro pontevedrês de Segurança, Guillerme Vázquez, a mobilizaçom festiva celebrará-se no Campelo de Santa Maria. Vázquez assegurou que o governo municipal (BNG) adoptará “medidas preventivas de vigiláncia e controlo em colaboraçom com a Polícia Nacional”. Em termos similares manifestárom-se ontem e hoje outros regedores locais como Melchor Roel, alcalde ‘popular’ de Viveiro, que assegura aliás que @s participantes na concentraçom da vila da Marinha “nom som jovens de Viveiro, mas gente de fora” (sic). Roel tildou a celebraçom de “provocaçom” e anunciou que se vam “tomar medidas”. Administraçom autonómica anunciou mudanças legais Ao fio do debate mediático, o bipartido anunciou ontem reformas legais para impossibilitar a celebraçom de ‘botelhons’ através da revisom da Lei de Drogas de 1996. Igual que no caso espanhol, o anúncio correspondeu a um responsável sanitário, o director geral de Saúde Pública Ramón Medina. Medina assegurou que “em muitas ocasions [fala no consumo de álcool] aparece associado à prática do botelhom” (!) e referiu-se às mortes em estrada para advertir que Sanidade promoverá reformas legislativas para homogeneizar a situaçom na Galiza a respeito do Estado. As declaraçons de Medina respondem à pregunta do deputado autonómico Miguel Santalices (PP) sobre “como restringirá a Junta o fenómeno do botelhom” e realizavam-se na Comissom de Sanidade do parlamento da CAG. Aliás, Sanidade baralha proibir a venda de álcool a menores de 18 anos, acoutar espaços para ‘botelhódromos’ e limitar o horário de venda. Por sua parte, o comissionado do Plano Galiza sobre Drogas, Victor Pedreira, afirmou que “há que regular o consumo de álcool na via pública” e qualificou de “complexa” a proibiçom total perante as festas populares galegas e o consumo em terraças. Pedreira apresentou como opçom alternativa os “botelhódromos”, espaços públicos acoutados para o consumo de álcool e controlados policialmente para impedir o acesso de adolescentes.