Interior anuncia que destinará mais Polícia e Guarda Civil ao território galego

O Ministro espanhol de Interior, José Antonio Alonso, chegará hoje segunda-feira à Galiza para inaugurar em Ponte Vedra um ‘Grupo de Resposta Especial contra o Crime Organizado’, mais conhecido polas suas iniciais Greco. A unidade policial constará de 25 agentes e localizará-se na esquadra da Polícia espanhola em Ponte Vedra. A visita do alto funcionário motivava ontem umha entrevista em La Voz de Galicia na que Alonso anuncia os planos do seu Ministério para a CAG. Perguntado a respeito da muito baixa ‘taxa de criminalidade’ que regista o nosso País, com 27.7 infracçons penais por cada 1000 habitantes –vintos pontos por debaixo da meia estatal e 40 a respeito da da UE- Alonso parabenizava-se pola situaçom e respondia cripticamente que “há que perseverar” ao tempo que reconhecia a existência de “problemas pontuais” dos que, segundo afirmou, dará conta no dia de hoje. A “perseveráncia” de ministro concreta-se na afirmaçom de que “a Polícia e a Guarda Civil vam seguir aumentando a sua presença na Galiza, porque é a melhor forma de garantir a segurança”. “Eu na Galiza seguirei pondo Polícia, Guarda Civil e aumentando os recursos, como o Greco, porque é a minha obriga como ministro do Interior do Governo de Espanha”, enfatizou Alonso, esclarecendo simultaneamente um facto evidente: que o incremento da presença e infraestruturas policiais no País nom é produto da “insegurança cidadá”, mas um objectivo em sim próprio. A respeito da instauraçom dum novo corpo repressivo para o ámbito da CAG por parte da administraçom bipartida, Alonso recunca em que “eu tenho-me que preocupar das polícias do Estado (…). Eu podo respeitar as iniciativas legítimas das comunidades autónomas, mas nom podo aconselhá-las porque os protagonistas da política galega tenhem que ser os galegos” (sic), assegurou. Actualmente, mais de 2000 polícias espanhóis, quase 4000 guardas civis e umha cifra que se aproxima dos 30.000 vigilantes privados –metade deles formados e titulados segundo directrizes de Interior e fiscalizados polos outros corpos policiais- componhem o grosso da força policial espanhola na Galiza administrativa. A administraçom da CAG projecta a criaçom de mais umha Polícia, a Autonómica, que disporia em 2008 de 2000 efectivos a partir dos 350 actuais. Reuniom com Pérez Touriño e cita com mandos policiais O ministro espanhol reunirá-se com os mandos policiais na CAG trás inaugurar a nova unidade operativa da Polícia espanhola. Aliás, tem previsto fazer um balanço da “luita contra o crime organizado” e reunir-se em privado com o presidente da administraçom autonómica na esquadra policial de Ponte Vedra.