Independentistas sabotam presença de Manuel Ameijeiras na Faculdade de Direito

Convidado polo decanato da Faculdade de Direito de Compostela, o Delegado do Governo espanhol na Galiza administrativa, Manuel Ameijeiras Vales, fijo ontem acto de presença no centro académico para falar sobre ‘Os reptos da segurança na Galiza’ numha conferência enquadrada nos cursos que o Centro Superior de Estudos da Defesa Nacional (Ceseden) celebra anualmente neste centro. Umha campanha prévia de denúncia, a apariçom de pintadas nos acessos à Faculdade e o protesto dumha dúzia de independentistas ligados a Agir acompanhárom a presença do principal responsável político das forças policiais no nosso País e dérom o necessário contra-ponto ao colaboracionismo com que o centro universitário se vem destacando através do convite a destacados funcionários e organismos estatais ligados à repressom. Ameijeiras gavou a acçom policial A denúncia dos e das estudantes independentistas nom impediu sem embargo a celebraçom do acto político-académico. Ameijeiras Vales aproveitou a sua presença para louvar a situaçom da ‘Segurança Cidadá’ no nosso País. “Os índices de criminalidade na Galiza som muito inferiores às meias espanhola e europeia”, afirmo o Delegado do Governo espanhol na Galiza na conferência pronunciada na Faculdade de Direito. Ameijeiras destacou as 28.1 infracçons penais por 1000 habitantes na Galiza, frente às 49 existentes no Estado espanhol, ou as 70 de Europa. Aliás, insistiu em que para que a populaçom se sinta “segura” nom só é necessário um número baixo de infracçons penais mas causar nas pessoas “sensaçom de segurança”. Contrasta este baixo índice de infracçons com os contínuos aumentos de efectivos dos corpos repressivos solicitados nos últimos dias pola administraçom autonómica ao Ministério de Interior. É de supor que todos estes agentes policiais solicitados usarám-se em fomentar a “sensaçom de segurança” de galegas e galegos, é dizer, acrescentar o controlo da cidadania e criar a sensaçom de estar sob umha permanente vigiláncia na linha das medidas aplicadas e pré-anunciadas nos últimos dias.