Celebra-se a mobilizaçom nacional contra a repressom de 18-D

620 pessoas acodírom na manhá de ontem em Compostela à manifestaçom nacional convocada pola Plataforma Galega contra a Repressom sob a legenda ‘Em defesa dos nossos direitos. Paremos a repressom’. A mobilizaçom partia por volta das 13:00 horas da Alameda e percorria diversas ruas da zona nova e o casco histórico compostelano rematando na Praça das Pratarias sob umha discreta presença policial. As câmaras utilizadas para a regulamentaçom do tránsito rodado situadas no Campo da Estrela e a Praça da Galiza, assim como as colocadas na Praça do Toral e Pratarias, gravárom em todo o momento o percurso da mobilizaçom. Durante o transcurso do acto, coreárom-se palavras de ordem contra o Estado policial, em favor da liberdade de expressom e associaçom, exigiu-se a retirada da ‘Guardia Civil’ e as demais forças de ocupaçom da Galiza, reivindicou-se a repatriaçom e a liberdade d@s pres@s independentistas galeg@s Ugio Caamanho e Giana Rodrigues e denunciou-se a criminalizaçom da mocidade galega O remate da manifestaçom nacional foi na Praça das Pratarias, onde o escritor Séchu Sende dou leitura ao manifesto assinado polas organizaçons e colectivos convocantes. O acto finalizava com o canto do hino nacional pol@s assistentes e a queima dum moneco que representava um ‘guardia civil’ por parte de duas pessoas encapuçadas.