Domingo 18 de Dezembro na Alameda da capital galega a partir das 12:30 da manhá. É a data, local e hora da mobilizaçom nacional que venhem de acordar umha série de colectivos, associaçons e organizaçons de todo o País em defesa das liberdades democráticas e contra a repressom. A que se projecta como umha importante manifestaçom que recabará todo o tipo de apoios sociais, políticos, culturais e sindicais sae à luz trás o salto qualitativo que supujo a recente detençom de dez militantes da AMI, o assalto a centros sociais e domicílios particulares pola Guardia Civil e a suspensom policial de duas páginas web independentistas. AMI, Ceivar, Sociedade Cultural e Desportiva do Condado (SCD), Agir, PCPG, Bases Democráticas Galegas (BDG), Briga, Centro Social Atreu da Corunha, jos_content da Galiza, Rádio Kalimero, PreSOS, Movimento polos Direitos Cívicos, Grupo Ecologista Erva, NÓS-Unidade Popular, Local Social Revolta de Vigo, portal galizalivre.org, MNG, Siareir@s Galeg@s, JCG, Casa Encantada, Centro Social Henriqueta Outeiro de Compostela, Baiuca Vermelha do Condado, Local Social A Esmorga de Ourense, Local Social O Pichel de Compostela, Colectivo antifascista O Piloto de Lugo, etc. conformam a nómina inicial e ampliável de associaçons, colectivos e entidades que ontem aderiam à celebraçom da citada mobilizaçom de 18 de Dezembro. As entidades participantes da iniciativa acordavam a redacçom dum manifesto público por volta da denúncia do processo regressivo que sofrem as liberdades democráticas no nosso País nos últimos anos, a criminalizaçom de ideias e organizaçons –particularmente, a mocidade independentista- e os ataques institucionais à autoorganizaçom popular em todas as suas formas. Resolviam, aliás, que a convocatória nacional obviasse o protagonismo de siglas e organizaçons, concorrendo todas as participantes sob a denominaçom “Plataforma galega em defesa dos nossos direitos. Paremos a repressom”. Convocatória aberta e ampla A iniciativa posta ontem em andamento vem reformular parcialmente umha outra anterior difundida por diversos sítios web independentistas que, no entanto, nom lograra recabar umha quantidade significativa de apoios e provocara certa confusom. O facto de a adesom à mobilizaçom nacional de 18 de Dezembro continuar aberta até o dia 12 deste mês favorecerá, sem dúvida, o alargamento da já de por sim ampla e plural série de apoios sociais, culturais, sindicais e políticos que aglutina a convocatória. De Ceivar queremos manifestar a nossa satisfacçom por esta iniciativa, que vem responder nom apenas ao salto qualitativo que em matéria de repressom supujo a detençom e criminalizaçom de dez militantes da AMI e o ataque frontal aos locais sociais, mas a um processo muito mais amplo de recurte de liberdades e direitos da cidadania galega. Processo evidente nos periódicos julgamentos de sindicalistas de CIG e CUT, a persecuçom da liberdade de expressom por parte de governos e polícias municipais, a generalizaçom da vídeo-vigiláncia policial dos espaços públicos, a manipulaçom informativa, o emprego da violência policial nos conflitos sociais, a deterioraçom da situaçom nos centros penitenciários, a satanizaçom de ideias e projectos sócio-políticos polos meios, etc. De aqui animamos todo o tipo de entidades a por-se em contacto com as integrantes da Plataforma e somar-se a esta resposta que em chave nacional procura denunciar o progressivo endurecimento da repressom e afirmar que a cidadania galega nom vai agüentar o espólio também dos seus direitos e liberdades.