08/04/2008 - Publicamos hoje traduzido ao galego um novo trabalho do sociólogo belga Jean-Claude Paye sob o título ‘Estados Unidos: do estado de urgência para o estado de excepçom permanente’. Trata-se nesta ocasiom dum documento em que Paye descreve detalhadamente como, após a última renovaçom da ‘Patriot Act’, a lei imposta nos Estados Unidos “como necessária resposta a umha situaçom de urgência” trás o 11-S de 2001, determinadas disposiçons que suspendérom as liberdades públicas e individuais adoptam carácter permanente.

07/04/2008 - Aurélio L., Roberto R., Salvador G., Davide B., Rute V., Constante V. e Joám P., activistas da iniciativa cívica pola Autodeterminaçom Causa Galiza, serám processados neste 9 de Abril às 11:30 da manhá no Julgado de Instruçom nº 6 de Vigo. A Polícia espanhola denuncia @s encausad@s de “lesionar” um agente antidistúrbios na concentraçom que no passado 6 de Dezembro se celebrava ante a esquadra da Polícia espanhola na cidade olívica para exigir a liberdade de quatro militantes independentistas detidos.

03/04/2008 - Carlos Cela Seoane foi detido no passado 23 de Janeiro no seu domicílio da Crunha por efectivos da ‘Guardia Civil’ dentro dum operativo que o instituto armado espanhol e os meios de difusom assegurárom que se desenvolvia “contra o Grapo”. Actualmente, o companheiro encontra-se privado de liberdade e ilegalmente dispersado na prisom espanhola de Valdemoro (Madrid) a 600 quilómetros do seu domicílio habitual. Do nosso organismo, dentro das iniciativas que desdobra a assembleia que exige a sua liberdade, apelamos às leitoras e leitores de ceivar.org a assinar a demanda de liberdade para Carlos Cela publicada no web ‘Carlos livre agora!’.

03/04/2008 - Mais umha vez, ganhar a liberdade de um dos nossos das gadoupas do Estado consegue-se com dinheiro. O militante independentista R. M. M., detido no passado dia 1 de Abril e posteriormente liberado com cargos que podem implicar sérias consequências penais, saia livre após abonar às arcas espanholas a quantidade de 3000 euros. Do organismo popular anti-repressivo fazemos um convite extensivo à militáncia independentista galega, a tod@s @s antifascistas e @s democratas autênticos a fazer frente solidariamente a esta nova imposiçom económica.

02/04/2008 - O militante independentista corunhês R. M. M. foi detido na tarde de onte por efectivos da Polícia espanhola acusado de “lesons” e “roubo com intimidaçom” causados a um indivíduo de extrema direita no passado 9 de Fevereiro. Segundo fontes de toda fiabilidade, sobre o meio-dia dessa jornada três jovens corunheses olhavam um indivíduo colocando colantes fascistas numha rua da cidade. Ao recriminar-lhe a sua atitude, o indivíduo desenvainhou um punhal produzindo-se um enfrentamento físico entre os jovens corunheses e o portador dos colantes fascistas.