10/02/2010 - Comunicam-nos nesta manhá o falecimento do militante basco contra a repressom Jon Etxeandia. Nascido em 1962 na vila basca de Indautxu, Jon foi detido com apenas 20 anos e acusado de militar na organizaçom independentista basca Euskadi Ta Askatasuna. Aquel jovem permaneceu preso durante 18 anos, participando nas mais importantes luitas carcerárias da época e saíndo em liberdade em 2001. Etxeandia reafirmara-se nessa altura na legitimidade e a vigência da causa basca ante centos de pessoas que acodiram ao seu recebimento. Com ele, como representante do movimento basco pró Amnistia, partilhamos palestras na Galiza na primavera de 2004 sobre repressom e cárcere.

04/02/2010 - Nesta manhá deixou-nos Antom Moreda, galego, patriota e figura chave para a reconstruçom do movimento nacional na segunda metade do século XX. Por parte das mulheres e homes de Ceivar queremos rendir o nosso humilde e sincero tributo de homenagem ao home que, por manter em pé a bandeira da liberaçom nacional deste País na Longa Noite de Pedra, e até a sua marcha, conheceu a repressom, a marginalizaçom e a persecuçom de próprios e alheios. Recolhemos o seu facho e as suas palavras -"Enquanto Espanha nom reconheça o nosso direito à separaçom, à independência, nom se pode falar de democracia"- com o compromisso de fazer algum dia realidade o sonho polo que viveu e luitou.

03/02/2010 - O Foro Galego de Imigraçom convoca para amanhá 4 de Fevereiro umha concentraçom de solidariedade com a sindicalista da CIG Laura Bugalho. A cita é a partir das 10:30 h. da manhá ante o edifício dos julgados de Compostela. Ali entregarám-se centos de pregos de apoio recolhidos a nível nacional e internacional reivindicando o arquivo do processo repressivo de que é objecto Bugalho desde a sua detençom em 2009.

03/02/2010 - Passadas duas semanas desde o ingresso do militante independentista galego Jurjo Rodrigues no centro de menores ‘Los Rosales’, a realidade confirma algumhas das nossas piores previsons: as condiçons de habitabilidade e o tratamento de que som objecto os menores nestes centros penitenciários encubertos evidencia a farsa da “reinserçom” e a “reeducaçom”, pondo a nu o seu autêntico carácter de centros de reclusom e castigo. À imposiçom de espidos integrais aos que é submetido o preso galego após ser visitado polos seu pais, ou incluso polo seu advogado, soma-se agora a colocaçom de várias sançons “por indisciplina”.

02/02/2010 - Efectivos ‘antidistúrbios’ da Polícia espanhola assaltárom nesta noite a enfermaria do estaleiro viguês Barreras para desalojar o grupo de trabalhadores da Assembleia de Parados do Naval que se encerrara nas instalaçons. A entrada produziu-se por volta das 00:30 h. da noite, primeiro, desfazendo a golpes com um maço a entrada da enfermaria e, depois, procedendo a destroçar parte do mobiliário e as instalaçons. Segundo a informaçom que facilita o web da central nacionalista CIG, “diante da violência com a que entrárom estes efectivos, os trabalhadores só pudérom chamar à calma” dos assaltantes.