06/05/2008 - “Começamos receber as notificaçons das multas a primeiros de Abril cada três ou quatro dias, e acho que ainda nom chegárom todas porque realizamos os protestos quase todos as segundas desde Dezembro até a última de Fevereiro”. Quem assi se exprime é Manuel Cao, patrom maior da Crunha e participante activo na luita contra a contaminaçom da Ria do Burgo e por um novo convénio desenvolvida neste inverno por mariscadores e mariscadoras. A ‘Subdelegación del Gobierno’, a ‘Guardia Civil’ e a Polícia Local impugérom ao colectivo laboral em conflito um número ainda desconhecido de multas que podem ultrapassar os 7000€.

06/05/2008 - Repete-se até o cansaço a tese de que existe maior sensibilidade face as liberdades democráticas nos Executivos espanhóis ‘socialistas’ do que nos ‘populares’ e modula-se a partir desta crença, que age como subtil ameaça, o comportamento político de milhares de galegos e galegas. Contodo, este mito nunca se verifica empiricamente. A práxis demonstra que, se por algo se destaca o PSOE, é por gerir períodos de crise nos que aplica com serveridade políticas de recurte social e repressom, apoiando-se na “legitimidade” que achega ser a opçom formalmente progressista e participando com o PP na construçom estratégica dum Estado fortemente policial.

06/05/2008 - O desenvolvimento do processo jurídico-repressivo que envolve nestas semanas 27 activistas do movimento anti-repressivo basco ispe mais umha vez a natureza antidemocrática do Estado e a inexistência da cacarejada separaçom dos poderes judicial e executivo. Advogados progressistas da Uniom Europeia organizados na associaçom ‘Advogados Europeus Democratas’ (AED) denunciárom a “arbitrária e inadmissível extensom do conceito de terrorismo até alcançar actividades públicas e democráticas acolhidas ao direito da liberdade de expressom e à acçom política e social livre”.

05/05/2008 - Há poucas declaraçons tam transparentes a respeito do futuro imediato que aguarda em termos repressivos ao que se dá em chamar soberanismo como a cita achegada polo historiador galego Bernardo Máiz na homenagem à Carmiña Graña, celebrada neste sábado em Cangas. Segundo Máiz, que citou nesse encontro público o ‘Subdelegado del Gobierno de España’ na Crunha Pose Mesura como fonte da sua informaçom, o PSOE consideraria “acidental” a convivência institucional com o BNG e prepararia políticas de dureza repressiva “contra o que existe além do sector oficial da CIG”.

05/05/2008 - Práticas repressivas de carácter policial, judicial e administrativo que nom há tanto tempo pareciam reservadas às ‘minorias radicais’, e que, portanto, nom geravam maior contestaçom, ameaçam agora com estender-se a crescentes sectores sociais. Após as notícias que demonstram que um corpo militar espanhol identifica e vigila as viaturas galegas que portam simbologia nacional e trás o visível alargamento da repressom policial, judicial e económica aos colectivos laborais em luita, os quatro liberticidas que presidem as ‘Subdelegaciones del Gobierno de España’ na CAG tomam agora cartas contra o direito de manifestaçom.