06/02/2009 - Segundo vimos de conhecer através de familiares directos do preso independentista galego José Manuel Sanches Gorgas, actualmente dispersado ao centro penitenciário de Aranjuez junto com Santiago Vigo Domingues, a direccçom da prisom espanhola notificou a ambos militantes galegos a sua iminente transferência de cárcere. Nesta noite, tanto Sánti quanto José Manuel pernoctarám na prisom de Aranjuez. Desconhece-se qual pode ser o novo destino ao que ‘Instituciones Penitenciarias’ desloque os dous presos galegos.

05/02/2009 - Nesta manhá ficava vista para sentença a causa contra os militantes independentistas galegos Alexandre Bolívar e Santiago Mendes, acusados de dar lume em 6 de Dezembro de 2007 a umha imagem do Chefe do Estado espanhol, Juan Carlos I de Borbón. Dezenas de pessoas concentrárom-se nas proximidades do tribunal especial para exprimir a solidariedade galega com os processados. Por sua parte, a Fiscalia espanhola reduzia à metade as petiçons de sançom económica para ambos militantes galegos.

29/01/2009 - “Menosprezar e vilipendiar a figura de SM o Rei” de Espanha será a causa que no próximo 4 de Fevereiro sente ante os tribunais de excepçom do Estado espanhol os cidadáns galegos Santiago Mendes e Alexandre Bolívar, ambos acusados de dar lume a umha imagem de Juan Carlos I de Borbón em 6 de Dezembro de 2007. Mendes e Bolívar, militantes independentistas, enfrentarám sançons económicas de 3600 e 5400 euros respectivamente por incinerar, presuntamente, um cartom com a imagem do rei do país vizinho.

29/01/2009 - A utilizaçom de ordenanças municipais rumadas, presuntamente, a velar pola limpeza e a higiene dos núcleos urbanos do País converteu-se por toda a parte num instrumento para desenvolver umha permanente ‘limpeza ideológica’ e dessatar umha política de perseguiçom contra aqueles movimentos e organizaçom que questionam o status quo nas cidades da Galiza. Do carácter estatal deste ‘novo’ modelo de intervençom repressiva que se estende por toda a parte informa a sua generalizaçom a centos de municípios de todo o Estado. A Associaçom Cultural Almuínha, na vila de Marim, está a ser agora alvo desta política de censura, perseguiçom e repressom económica.

29/01/2009 - Após semanas de suspensom da actividade informativa, ceivar.org retoma o seu ritmo habitual de produçom de notícias. Neste período de tempo som várias as informaçons de relevo às que nom pudemos dar cumprida resposta. Contodo, aguardamos poder restabelecer em breve a dinámica habitual e defender a nossa modesta posiçom como portal galego especializado na denúncia da repressom social e política e na solidariedade com todo tipo de retaliad@s. Anunciamos, aliás, que na segunda quinzena de Fevereiro renovaremos definitivamente a actual página web operativa desde Julho de 2005.