10/06/2009 - Ante a enjurrada de expedientes sancionatórios que as ‘Subdelegación del Gobierno de España’ em Lugo, Ourense, Ponte Vedra e Crunha estám a enviar às casas de dezenas de activistas pró galego em todo o País, de Ceivar disponibilizamos um texto-base útil para recorrer estes expedientes, curtados maioritariamente por um idêntico padrom. Alertamos, contodo, de que é a própria instituiçom que os emite em base a directrizes políticas a que, finalmente, resolve também os recursos interpostos contra as multas com o que a fiabilidade destes é mais que duvidosa.

10/06/2009 - Segundo informa o PGL, “numerosos activistas pró galego” recebérom hoje nas suas moradas notificaçons de expedientes sancionatórios por parte da ‘Delegación del Gobierno de España’ na CAG. Esta página web denuncia que várias das pessoas sancionadas participaram em 8-F no acto ridiculista desenvolvido na Alameda de Compostela para contestar a mobilizaçom de GB em favor do extermínio da língua galega. Assegura o PGL que a comunicaçom oficial implica os expedientados em “actos violentos”, acusa-os de “impedir o direito de manifestaçom” d@s seguidores de Gloria Lago e José Manuel Posada e impom multas por valor de 600€.

10/06/2009 - Com a convocatória pública da ‘II Cadeia Humana pola Liberdade dos Presos e Presas Independentistas Galegas’ chega-nos também umha sentença do magistrado Francisco Javier Míguez Poza em que este condena um militante de Ceivar a pagar 100€, ou ingressar dez dias em prisom, por “umha falta contra a ordem pública do artigo 634 do Código Penal”. Assegura o juíz, um velho conhecido para a militáncia independentista pola sua aberta beligeráncia, que durante a anterior ediçom da Cadeia Humana o processado emitira através da megafonia palavras-de-ordem como “Estado espanhol, Estado repressor” e engade aliás outras da colheita dos agentes que agem como acusaçom tais como “Polícia assassina!” e, incluso, “ETA mata-os!”.

09/06/2009 - A Mesa Nacional do organismo popular anti-repressivo iniciou nesta fim-de-semana passada os preparativos da ‘II Cadeia Humana pola Liberdade dos Presos e Presas Independentistas Galegas’. O acto, que desde 2008 procuramos seja parte do calendário anual do organismo e da militáncia nacionalista galega, desenvolverá-se na Praça da Galiza da capital e visa denunciar a existência de independentistas galeg@s pres@s, a ilegalidade da dispersom penitenciária, a tortura e a plena vigência dos tribunais de excepçom como instrumento para a repressom do delito de natureza política.

09/06/2009 - Desde a ‘Delegación del Gobierno de España’ na CAG, o PSOE aplica a repressom pecuniária como mais um instrumento de coacçom dos movimentos sociais galegos. A estratégia que seguem os quatro ‘virreis’ provinciais espanhóis ligados ao ‘Partido Socialista Obrero Español’ é sangrar as arcas de organizaçons e militantes e impor umha repressom que se invisibiliza sob a pátina do trámite administrativo. Dous independentistas de Ferrol fôrom na passada semana as últimas “vítimas” desta prática com a que o novo ‘Delegado del Gobierno’, Antón Louro, emula o seu antecessor, Manuel Ameijeiras Vales.