23/07/2008 - O preso independentista galego Sánti Vigo foi conduzido às 10:00 da manhá de onte aos julgados de Aranjuez (Madrid) para emprestar declaraçom polas agressons de que foi objecto em 14 de Junho a maos de quatro carcereiros. A transferência do militante galego para os julgados fijo-se num furgom custodiado por efectivos da Polícia espanhola que, no entanto, nom evitárom que o preso independentista fosse agredido por um preso social deslocado com ele para os julgados. De volta à prisom, sobre as 12:30 h., Sánti Vigo era espido à força polos funcionários e conduzido para o módulo de isolamento.

23/07/2008 - A ninguém que esteja implicad@ na luita contra a repressom e na solidariedade com os presos e presas políticas lhe resulta alheio o nome de Josefa Seoane Vaz, mais conhecida por ‘Pepita’. Antifascista, comunista, radical nos plantejamentos, defensora activa e presencial de todas as causas justas e mae de três presos políticos galegos dispersados em três pontos distantes da geografia penitenciária do Estado espanhol, no que é mais um exemplo do nível de crueldade que o Governo espanhol reserva para os contornos familiares, sociais e políticos dos presos e presas políticas, A Pepita receberá neste sábado a homenagem do povo.

23/07/2008 - A primeira hora de hoje, efectivos da Brigada de Limpeza da câmara municipal de Compostela retiravam na íntegra 150 cartazes colados nesta noite passada polo organismo popular anti-repressivo para anunciar a Cadeia Humana pola repatriaçom e a liberdade d@s pres@s polític@s galeg@s. O dispositivo policial que nestes dias blinda a capital ante a possibilidade de sabotagens independentistas tem como segundo objectivo fazer impraticável a liberdade de expressom da militáncia nacionalista.

23/07/2008 - Dous activistas da Causa Galiza que nesta noite passada difundiam a convocatória soberanista do Dia da Pátria serám denunciados no julgado “por desobediência”. A denúncia produziu-se após ambos serem localizados por segunda vez consecutiva por umha patrulha da Polícia local de Compostela quando colavam cartazes anunciando a mobilizaçom do dia 25. A primeira localizaçom foi de aviso. A segunda, após seguirem colando cartazes apesar da advertência de que existe umha proibiçom permanente sobre esta actividade em todo o termo municipal, significou a imposiçom da citada denúncia.

22/07/2008 - A resposta dada recentemente pola ‘Delegación del Gobierno de España’ na Galiza administrativa a umha interpelaçom apresentada polo Movimento polos Direitos Civis num caso de vídeo-vigiláncia privada anuncia luz verde para que, no sucessivo, video-câmaras particulares varram espaços públicos da CAG. Segundo informa o MpDC, a ‘Delegación del Gobierno’ “nom se considera competente no caso dumha câmara [privada] instalada num edifício da Crunha que foca a rua”. A importáncia da resoluçom reside em que indica que Madrid estaria por dar via livre à aplicaçom extensiva deste critério em outras situaçons similares.